İkinci nəsil peyvəndlərin tətbiqindən sonra ümumiyyətlə, bu virusu kökündən məhv eləmək mümkündür.

Sehiyye.info xəbər verir ki, bu sözləri Almaniya-Azərbaycan Radioloji və Neyroradioloji Cəmiyyətinin sədri, Köln Universiteti klinikasının tibb elmləri doktoru, azərbaycanlı alim Nuran Abdullayev "Yeni Musavat"a COVİD-19 və onun mutasiya olunmuş ştammı ilə bağlı müsahibəsində deyib.

“Bu virusa "yeni virus" demək, "virus yenidən mutasiya olundu, daha pis oldu" demək düzgün deyil. Bunu bilməlidirlər ki, bu gün nə qədər özlərini qoruyurlarsa, virusun yeni formasının yaranmasından asılı oımayaraq, mübarizəyə eyni şəkildə davam etməlidirlər. Əminliklə vurğulayıram ki, nə qədər təhlükəli olsa da, yeni virus növünün yayılmasının canlı ünsiyyətləri minimuma endirməklə qarşısını almaq olur. İkincisi isə insanlar bilməlidir ki, ikinci nəsil peyvəndlərin tətbiqindən sonra ümumiyyətlə, bu virusu kökündən məhv eləmək mümkündür. O da selikli qişa immunitetini yaratmaqla olacaq. Hətta mümkündür ki, həmin növ peyvəndləri buruna yalnız sprey şəklində vurmaqla insanlarda selikli qişa immuniteti yaradılsın. Bundan sonra da insan nə qədər bu virusla kontaktda olsa, xəstəliyə tutulmaz. Bunu yaratmaq mümkündür, ikinci nəsil peyvəndlərin artıq tədqiqatları aparılır. Avropada da var. Əgər belə davam edərsə, təxmini 11 aydan sonra onların da tətbiqini gözləmək olar. Düşünürəm ki, birdəfəlik bu problemdən qurtara biləcəyik”, - deyə azərbaycanlı alim bildirib.//Axar.az