Ötən ay Elmi-Tədqiqat Tibbi Profilaktika İnstitutunun qocaman əməkdaşı, tanınmış alim, həkim Şəfiqə Mahmudovanın 100 yaşı tamam oldu.

Olduqca sağlam, qıvraq, pozitiv görünən bu xanımla görüşüb, həyat və uzunömürlülük sirlərini öyrənmək istədim.
İnstitutun rəhbəri, professor Adil Allahverdiyev, Parazitar və Tropik xəstəliklər şöbəsinin protozoloji bölmənin müdiri, t.e.f.d Fatma xanım Hüseynova bu istəyimizi qəbul etdi və biz hamılıqla Şəfiqə xanımın qonağı olduq.


Şəfiqə xanım evinə qonaq gələndə çox sevinir. O özü ayağa qalxıb bizi qarşıladı, hamı ilə görüşdü və çay içə-içə bütün suallarımıza cavab verdi. 100 yaşı olsa da, çox yaxşı eşidir, eynəklə aydın oxuyur, həm də hər şeydən məlumatlıdır. Adil Allahverdiyev institutun 100 illiyi münasibətilə Şəfiqə Mahmudovaya fəxri professor adını təqdim etdi:

“Bizim institutun 100 illiyi oldu. Sizin də maşallah, 100 yaşınız. İnstitutumuzla eyni yaşdasınız, elm mərkəzimizin ən böyük alimisiniz. Uzun illər bu institutda uğurla çalışdınız, Helmintozların immunologoyası laboratoriyasını yaratmısız. Şəxsən mənim elmdə formalaşmağımda böyük rolunuz olub. Siz bütün həyatınızı bizim instituta həsr etmisiz, bunun qarşılığını az da olsa, ödəmək üçün Elmi Şura qərara gəldi ki, institutun 100 illiyində sizi yubileyinizlə əlaqədar Fəxri Professor seçək. Bu, institutumuzun 100 illik tarixində bir ilkdir. 100 ildə ilk adamsız ki, fəxri professor seçilmisiz. Bu sizin haqqınızdır. Sizi təbrik edirik".




//medicina