Müasir dünyada insanların çoxu gündəlik su ehtiyacını qəhvə, çay və ya şirin qazlı içkilərlə qarşıladığını zənn edir. Lakin tibbi və psixoloji araşdırmalar sübut edir ki, heç bir maye təmiz suyu əvəz edə bilməz. Hüceyrə səviyyəsində bədənin təmizlənməsi, maddələr mübadiləsinin (metabolizmin) qaydasında çalışması və beynin optimal funksiyası bilavasitə adekvat su qəbulundan asılıdır. Gün ərzində kifayət qədər su içməmək təkcə fiziki yorğunluq və böyrək problemlərinə deyil, eyni zamanda diqqət dağınıqlığına, baş ağrılarına, xroniki gərginliyə və əhval-ruhiyyənin səbəbsiz düşməsinə gətirib çıxarır. Bəs əslində kim, gün ərzində nə qədər su içməlidir?

Su norması yaşa, çəkiyə və fiziki aktivliyə görə köklü şəkildə dəyişir. Mütəxəssislərin hesablamalarına görə:
Uşaqlar üçün: Yaş qrupundan asılı olaraq gündəlik təmiz su norması 1.2 – 1.7 litr arasında dəyişir. Uşaqların orqanizmi böyümə mərhələsində olduğu üçün susuzlaşmaya xüsusilə həssasdır.
Böyüklər üçün: Hər kiloqrama təxminən 30-35 ml su hesabı ilə orta hesabla 2 – 2.5 litr təmiz su içilməlidir.
İdmançılar üçün: Yüksək fiziki gərginlik və tərləmə nəticəsində itirilən maye və elektrolitləri bərpa etmək üçün bu rəqəm gündəlik 3.5 – 5 litrə qədər yüksələ bilər.
Su azlığı bədəndə toksinlərin toplanmasına və hüceyrə daxili təzyiqin düşməsinə səbəb olur.
32gun.az-a açıqlamasında dietoloq və bədən funksiyaları üzrə mütəxəssis Günay Məmmədova bildirib:
“İnsanların böyük əksəriyyəti susuzluq hiss etmədikcə su içmir. Lakin susuzluq hiss etmək artıq bədənin 'SOS' siqnalı verməsi və 1-2% susuzlaşmaya məruz kalması deməkdir. Az su içildikdə qan qatılaşır, ürək daha ağır şəraitdə işləməyə başlayır, böyrəklərdə daşlaşma prosesi sürətlənir və beyin hüceyrələri lazımi oksigeni ala bilmir. İdmançılarda bu, əzələ qıcolmalarına, uşaqlarda isə diqqət çatışmazlığı və dərslərdə geriləməyə gətirib çıxarır. Əgər sağlam yaşamaq və erkən qocalmanın qarşısını almaq istəyirsinizsə, günə mütləq bir stəkan ilıq təmiz su ilə başlamalı və gün ərzində bunu vərdişə çevirməlisiniz.”