İsveçin Lund Universitetinin alimləri müvəqqəti kardiostimulyator rolunu oynayan inyeksiya məhlulu hazırlayıblar. Dərmanın bir inyeksiyası təcili vəziyyətdə insanı ürək aritmiyasından xilas edə bilər.

Sehiyye.info xəbər verir ki, tədqiqat Nature Communications (NatComms) elmi jurnalında dərc olunub.

Aritmiya ürəyin elektrik siqnallarında pozulma nəticəsində yaranır və orqanın çox sürətli, yavaş və ya nizamsız döyünməsinə səbəb olur. Problemlə mübarizə aparmaq üçün implantasiya edilə bilən kardiostimulyatorlar və dərmanlar istifadə olunur. Ancaq bəzi hallarda bu üsullar əlçatan olmaya bilər.

Komanda bir şpris vasitəsilə idarə olunan nanohissəciklərə əsaslanan formula hazırlayıb. Bədən toxuması ilə təmasda olduqda, ürəyin ətrafında uzun elektrik keçirici molekullar zəncirindən ibarət bir struktur yaranır. Bu elektrod canlı hüceyrələrlə birləşir və adi cib telefonu kimi xarici mənbədən gərginlik ötürməyə qadirdir. Cərəyan inyeksiya yerində dəriyə bərkidilmiş kabel vasitəsilə çatdırılacaq.

Alimlərin fikrincə, belə bir sistem beş günə qədər işləyə bilər, bu da xəstənin xəstəxanaya çatmasına və müalicə almasına imkan verəcək. Bu müddətdən sonra polimer elektrod insan orqanizmində zərər vermədən həll olunacaq.//oxu.az