Ölkədə ərzaq və qeyri-ərzaq məhsulları bahalaşmaqda davam edir. Supermarket və ərzaq mağazalarında hər dəfə fərqli qiymətlərlə rastlaşırıq. Məsələnin digər tərəfi isə odur ki, əksər supermarketlərdə məhsulun qiyməti piştaxtada aşağı göstərilir, kassaya yaxınlaşanda isə baha qiymət deyilir. Bəzi supermarketlərdə bu hal dəfələrlə təkrarlanıb.
Onu da qeyd edək ki,bu kimi hallar ən çox OBA Marketlərdə müşahidə olunur.

Belə hallar marketlərin fırıldağıdır, yoxsa mağaza işçilərinin səhvindən irəli gəlir?

Arasdırma.info xəbər verir ki,İqtisadçı ekspert Natiq Cəfərli BiG.AZ-a açıqlamasında bildirib ki, əlavə dəyər vergisi kassada hesablandığına görə əksər məhsulların qiymətində bu hal yaşanır:

"Bu, əslində fırıldaq deyil. Bir çox marketlər, qanunvericiliyə uyğun olaraq, əlavə dəyər vergisini kassada hesablayır. Məsələn, 5 manata olan məhsul əlavə dəyər vergisi 18 faizdir, bu da təqribən 90 qəpik edir. Kassaya yaxınlaşanda bu zaman 5 manat 90 qəpik göstərir. Marketlərin reklam kimi bundan istifadə etməsi mümkündür və bu, qanun pozuntusu deyil. Ona görə də düşünmürəm ki, burada bir fırıldaqdan söhbət gedir. Məsələ bundadır ki, əlavə dəyər vergisi çox yüksəkdir və bütün marketlər də əlavə dəyər vergisi öhdəçisidirlər. İstər-istəməz bu 18 faiz hər dəfə kassada aldığımız ərzaq məhsullarının üzərinə gəlir".
Digər ekspert Şərgi İbadov isə belə halların şirkət tərəfindən qəsdən törədildiyini istisna etmir.Çünki,bir neçə dəfə bu halla rastlaşdıqda kassirin qiymətlərdən xəbərsiz olduğu və qiymət fərqinin şirkət tərəfindən tənzimlədiyini bildirilib.