Azərbaycanda ailə münasibətlərində davranışa nəzarətlə bağlı sorğu keçirilib.

Oxu.Az-ın məlumatına görə, BMT-nin Əhali Fondunun (UNFPA) və Ailə, Qadın və Uşaq Problemləri üzrə Dövlət Komitəsinin “Azərbaycanda gender bərabərliyi və gender münasibətləri: mövcud vəziyyət və imkanlar. Kişilərin Gender Bərabərliyinə Münasibətinə dair Tədqiqatın nəticələri üzrə Hesabat”ında qeyd edilib ki, sorğu zamanı kişilər tərəfindən partnyorlarının davranışına nəzarətetmə zorakılıqla əlaqələndirilən risk amili kimi təqdim olunur.

Bu respondentlərdən təşkil olunmuş sorğuda qadın həyat yoldaşı üzərində nəzarət adi bir hal hesab olunub. Kişilərin çoxu (91,4%-i) onların harada olduqlarını hər zaman bilmək istəyini ifadə edibsə, 79,1%-i öz partnyorlarına müəyyən paltarlar geyinməyə, ümumiyyətlə, icazə vermədiyini bildirib.

Eyni zamanda, kişilərin çoxu qadınlarla müqayisədə, ər-arvad cütlüyünə təsir edən qərarlarla bağlı söz sahibi olduqlarını və ya bu qərarlara, habelə cinsi əlaqələrin nə vaxt baş verməsinə və partnyorlarının vaxt keçirdiyi insanlara daha çox nəzarət etdiklərini qeyd edib.

Kişilərin praktiki olaraq hamısı (99,8%-i) sorğuda davranışa nəzarətlə bağlı əks olunmuş yeddi məsələdən ən azı biri ilə yaxından məşğul olduqlarını bildirib.